Vegere

Mafên Êzdiyan li Îraqê tên xwarin!

kaniya-sipi

16.11.2005

Li gor agehdariyên ku di malpera Bahzani.org de hatin weşandin, birêz Qewal Sifo, serokê „Birêvebiriya Ewqafê Êzdiyan“ li Îraqê, di nameke xwe de li roja 13.11.2005 an de diyar kir ku di Lîsta Kurdan de ji boy Hilbijartinên dahatû de li Îraqê navê Êzdiyan tê de nîn e. Rojanama Hewal di hijmara xwe ya 156 an de, di roja 12.11.2005 an de navê hilbjarên Lîsta hevpeymana Kurdistan li Parêzgehêt Îraqê belav kiribû, ji bilî hilbijarekî Êzdî li Parêzgeha Mûsil (li gor lîtseyê hijmara 9 ye) navê Êzdiyan tê de nîn e.

Hêja Qewal Sifo rasarast axivî û got ku bi vî rengî Kurd maf û xwestek û daxwazêt  Êzdiyan ser guhê xwe re ditavêjin û li soz û peymanên xwe xwedî dernakevin. Herweha gazî hemî Êzdiyan kir ku ji vê yekê heydar bin û heke Kurd Lîsteya xwe serrast nekin û ji kêmayî navê pênc (5) Kesên Êzdî danexînin lîsteya hilbijartinê wê demê Êzdî bê deng namîn û ew jî dê dengê xwe nedine lîsteya hevpeymana Kurdistan.

Ji ber vê bûyera giring hêja Qewal Sifo berê xwe de hemî êzdiyan ku tevger û bizava xwe xurt bikin, ta zanibin sedema vê neheqiyê çi ye.

Weke tê zanîn di dema rêjîma Sedamî xwînxwar gelek zordarî li Êzdiyan hatiya kirin û ew xwe wekî beşekî ji civaka Kurdistanî dihijmêrin û ew jî wekî hemî ol û gelêt Îraqê hêvî dikin ku rewşa Îraqê bi tevahî xweş bibe û karibin bi hemî gelêt Îraqê re bi aramî û aşîtî bijîn.

kaniya-sipi