Komela Kaniya Sipî

Royarê Amedî

Xwîna kewan û Siwarên Rewrewkê

Ji kîjan dengî, Tu berzbûyî
Ji kîjan şînê, Tu derbûyî

- Ji lihevketina ûmîdên kurdûnde?
- Ji deşta rewrewkiya dîrokê?

Deng li hev Siwar dibin,
                     ûmîdan sazdikin
Deng li hev Siwar dibin
                   şîna "kewan" sazdikin
Deng li hev Siwar dibin
                  berdan/ ne berdana

dengê min sazdikin

Hêvîya tovên evînê
di kûrbûna dilan de
peyva qedexekirî
di çûyînên qonaxan de
Hewara qurmiçî
di dirêjahiya şînan de

Ji kîjan dengî, tê berz bibî?
Ji kîjan şînê, Tê derbbibî

- Ji li hevkitina ûmîdên kurdûnde?
- Ji deşta rewrewkîya dîrokê?
- Ji borîzanên min....?

- ji …………………

- ji ………………

- Otonomî.....
- Bijî Otonomî

- Kuştin ...
- Bijî Kuştin

- Ling hildan....

- Bijî Ling hildan

- Piroystiroyka....

- Bijî Piroystiroyka

- Mafê çarenûsî...

- Bijî

- Balyozxane...

- Bijî

- Ev rêjîm bijî , ew rêjîm bimre

- Bijî.... bimre

- Ew rêjîm bijî, ev rêjîm bimre

- Bijî.... bimre

Li Ku ma dengê te?
Li Ku şîna te danîn?

Li Ku man parêzgarên damarên te?
Bi ku de çûn temaşakarên te/ Çepkdarên te

Dengê her dengî
Dengê ne tu dengî

Ronaka her ronahiyê
Mirina jiyanê
Jiyana mirinê

Karwan derbasbûn,

govend xelas bû
Meyger westiya,

piştî ahengeke mezin

Tu tenê,

bi tenahiyê re ma

Gotina pêşîn: navê te
Mirina yekemîn: ji bo te

Gava te bang kir
tu bê deng ma

Gava tu bê deng ma
rojnameyan tu himbêz kirin

Gava rojnameyan te himbêz kirin
tu bûyî gulleya balyozxaneyan

Gava tu bûyî gulleya balyozxaneyan
tu, xwîn û kew, giriya

Gava tu, xwîn û kew giriya
karwanên şînan, derbasbûn

Bi hêrs te bang kir
lê tu bê deng mabûyî bû
Hê..hê Karwanên şînê
Bêhnvedana min himbêz bikin
Hê..hê gulîstanên bi şînê avdayî

Bi dengê bilbilan
Bi bêhna sorgulan

Birîna min, belav bikin
Bilind bikin

Hê hê gulîstanên şînê
di welatê kew û (na)yên
bê deng de:

Xwe raxin, bibin pirr
Bibin çem û cobar
Bibin rê, bibin derya

Ta ku Karwan, derbas bibin;

Karwanên ronahiyên meydana Çarçira ,

Karwanên borîna Dêrsimê,

Senendacê, Zêwa , Cirnikê, Amûdê , Helepçeyê

Karwanên xewnên Silêman

Karwanên Xwîna kewan
Qirêjiya demê ye
Di hinava demê de

Kirêtiya mirovaniyê ye
Di mirovaniyê de

Ketina mirov û rûmeta ye

Tazîkirina hemû pîrozî û serfiraziya ye

kuştina asoyên andeko ye
Hûnana helbestê ye

Stêrek sêwî bû,
di ezmanê meyî tarî de

Govenda rondikên rewanpakan bû
di dîroka şîna Kewan de

Hewarek berdewamkirî bû
di dirêjahiya birînê de

Deng bû.....!
Reng bû.....!
Hêviyek bû.....!
Pirsiyariyek bû...!
Geşkirina destana xwîna doh bû

Lê.....
Dastan her dastan ma
Hêvî her hêvî ma

Dîsan ,

bendewariyê,
Ciyografiya şînê, xemiland
Siwarên pirsên mirî
xurcikên xwe, dagirtin
lêkolîngêrên demên rizyayî
borîzanên xwe, paqijkirin

Lê....
Tu ma, li cihê xwe, Tu ma
Tenhayî – dîsan - bi çavnêrîyê re
hate meyandin

Siwarên hespên spî ,
Hespên xwe, dan bi bûkan
bûkên xwe, dan bi tûtûkan
û tu ma, li cihê xwe/
bi şîna xwe ve
tu ma
û şîna te, bi te ve, ma

Qîrîna te berztir bû
Hewara te bilindtir bû

Siwarno werin...
Siwarno werin...
Tenê werin

Ne xeme, Ku hespên we
ne spî bin, an tune bin

Ne xeme, ku tûtûkên we
şikestî bin

Siwarno werin
Tenê werin...

werin... werin

Siwar belav bûn
piştî ahenga guherînê
aheng xelasbû

perde -piştî hinek çepik-
hate berdan

Hê... hê bajarên ku hûn
min himbêz dikin

Bi ûmîd û arama gihiştinê

ez , di hinava we de ,
tême dalqandin

Hê... hê hewara, Ku bilind nabe
              wek kewên welatê min
              ez ê çawa te berdem?
                       û mirov bimînim
                       û mirov bême dîtin

Ez ê çawa te belav bikim?
wek belavbûna kewên welatê xwe

Hê... hê welatê bê gewde
di nexşan de

Hê... hê welatê bê nexşe
di gewdeyan de

Ez ê çawa bûka ,

Ku nema maye bûk,

û tûtûka şikestî,
bi hespê spî re biguherînim

Hê... hê kewên welatê min,
yên Ku hûn tenê,li gewdeyê cîhanê,
sînorên welatê min in

Ez ê çawa vê şînê, himbêz bikim?

Ez ê çawa birînekê, bi vê kûrbûnê ramûsînim?

Ez ê çawa ciyografiya belavbûna we
bi teşiyên xewnên xwe, bihûnînim?

Ku maye?
Ku maye, di qonaxên xewnan de,
şîn, tê de, şînehatiye?

Çi maye?
Çi maye, di rista hêviyan de
ne bûye, bendewarî?

Kîjan deng?
Kîjan deng, di berdana dengan de

vala ne bûye ?

Kîjan şîn?
Kîjan şîn , di şînan de,

di hemû şînan de,
mezin ne bûye?

Lê gelo...

Ji kîjan dengî tê beriz bibî?
Ji kîjan şînê tê der bibî?

- Ji lihevketina ûmîdên kurdûnde?
- Ji deşta rewrewkî ya dîrokê?
- Ji borîzanên min?
- Ji....?
- Ji....?
- Ji....?

Alek ji berdewamiya şînê re
Alek ji kêferata jiyanê re
Alek ji belavbûna kewan re

Top